Staðfest af háttsettum.....

Hvers konar fréttamennska er þetta? Staðfest af háttsettum vestrænum embættismanni síðdegis í dag? Búið. Er hann færeyskur? Danskur? Íslenskur? Bandarískur? Kommon....

Háttsettur al-Qadaliði drepinn

Þistilfjarðarspámaðurinn

Guðmundur sagnamaður frá Raufarhöfn sagði mér einu sinni sögu af bónda í Þistilfirði sem hét Aðalsteinn. Aðalsteinn þessi var einn af þeim fyrstu í sveitinni sem fékk sér útvarpsviðtæki fljótlega eftir að Ríkisútvarpið hóf útsendingar. Árið hefur líklega verið 1930-31. Þá hafði ríkt mjög harður vetur og ætlaði hreint ekki að sleppa klónni. Komið var fram á sumar og enn mjög kalt í veðri og bændur farnir að óttast verulega um sinn hag, kalin tún  og fóður á þrotum. Aðalsteinn bóndi var mjög vinsæll í sveitinni, ekki síst vegna þess að hjá honum var hægt að hlusta á veðurspána. Langþreyttir á kuldanum fjölmenntu bændur nú á bæ Aðalsteins og spurningin var einföld: Hverju spáir hann? Þá mælti Aðalsteinn þessi spaklegu huggunarorð: Spáir, hann spáir kuldakasti!!!

Handrukkarahetja lumbrar á fjölskylduföður?

Enn ein "stríðshetjan" stefnir á hið "Hvíta Hús". Er ekki kominn tími til að við, hið svokallaða fullorðna fólk, skiljum innihald og merkingu þeirra orða sem við notum dags daglega? Stríðshetja? Herforingi sem stjórnar og skipuleggur dráp á saklausu fólki? Hvers konar kjaftæði er þetta? Við gætum alveg eins tekið okkur í munn: "Handrukkarahetja lumbrar á fjölskylduföður". Hvað er svona hetjulegt við að drepa og limlesta fólk? Hvaðan kemur þessi hugsunarháttur? Frá Bandaríkjunum? Eða úr Íslendingasögunum? Og til að kóróna allt saman þurfa "stríðshetjur" að búa í hvítu húsi, svona til að undirstrika sakleysið. Stríðshetjur eiga skilið að búa í hvítu húsi á gamals aldri. Svona virðingarvottur fyrir allar "hetjudáðirnar". Magnús Ásgeirsson skáld og ljóðaþýðandi bjó til nýyrðið "biðhetjur" um börnin sem biðu í kjöllurum Lundúnaborgar í seinni heimsstyrjöldinni eftir að sprengjurnar myndu falla. (Úr þýðingu hans á ljóði Nordahls Grieg). Það voru hetjur. En blessuð börnin, Þau báðu ekkert um það, að verða hetjur.

Giuliani hættur

Riðið grimmt á Kjarvalstöðum

Þær fréttir berast að riðið sé grimmt á Kjarvalstöðum. En nú eru það ekki listamenn sem hleypa á skeið heldur þeir, sem ríða þarfasta þjóninum. Kannski er bara kominn tími á að breyta Kjarvalstöðum í hesthús? Og breyta starfsheiti forstöðumanns í staðarhaldara? Það er mjög áríðandi og ríður á miklu að umræða fari fram um þetta þjóðþrifamál. Þá værum við að minnsta kosti laus við þessa listamannsræfla sem hanga þar að öllu jöfnu.

Með drif á öllum

Sandgerði, Akranes, Reykjavík

Bíddu, keyptu HP Grandamenn ekki kvóta í Sandgerði og gerðu fólk atvinnulaust þar um árið? Var ekki landvinnsla aukin á Akranesi í staðinn? Nú er hún í andaslitrunum. Og nú er þetta komið til Reykjavíkur. Hinnar frjálslyndu og sjálfstæðu Reykjavíkur. Þið leiðréttið mig ef ég fer með rangt mál.

Sagt upp hjá HB Granda eftir 44 ár

articeland.com

Fyrir þá sem hafa áhuga. Nokkur nýleg verk eftir mig má skoða á: articeland.com og smella á nafnið mitt þar. Uppgefin verð eru ekki rétt. Öll verkin eru máluð með kaffi. Vessgú!

Saga sem Simad sæfari samdi, skemmtilega skælbrosandi, af gefnu tilefni

Simbad sæfari sigldi skipi sínu Sæfara suður sægrænt Svartahaf. Sæfarinn stórfenglegi sýndi snilld sína, sífellt sleikjandi stórbrotna síbylgjuna. Storkandi sortanum, sigldi sterkur sjómaðurinn staðfastur stefnandi sifellt suður skelfilegt Svartahaf. Stökkvandi sædjöflar stinnir, sterkir, svignuðu svekktir, sárgramir, sökkvandi. Steikjandi sól sást skælbrosandi sleikja sótsvört skuggaleg ský. Skipstjórinn sjóndapri svolgrandi Stolisnæja, stefndi staðfastur suður, syngjandi síkátur stefið, Sigurður sjómaður. Spyrjandi Suðrið sæla stöðugt stórra spurninga. Suðrið sæla svaraði spurningum sjóarans svolítið stuttlega, stamandi, stynjandi. Stop! Stans! Stop! Skrokkurinn stóri sigldi samt staðfastur, stefnandi sjóaður suður, slóttugt Svartahaf. Sagan sýnir Simbað sæfara stálhraustan sjómann stöðugt sigrandi.

Framhald síðar.  

 

Gægjugataslugsarar

Orð í tíma töluð. Ég hef séð fólk keyra nánast með gægjugat á framrúðunni. Svo ekki sé talað um hliðar og bakrúður. Það er engin afsökun að eiga ekki góða sköfu í bílnum eða hita bílinn upp svo bráðni af rúðum. Þó fólki liggi lífið á í hvunndagnum þá getur slugs í þessum málum einfaldlega endað líf þeirra sem verða á vegi svona gluggagægjaslugsara. Og hana nú!

Sekt fyrir hélaðar rúður

Strúturinn stingur hausnum í sandinn ef Arsenal tapar

Það er Arsenalmaður hér á blogginu og fer hann gjarnan hamförum ef Arsenal vinnur leik og svo stekkur hann hæð sína í loft upp (sem ég veit nú reyndar ekki hver er) ef Tottenham tapar leik. Hann kommenterar oft á enska boltann og þó ég sé nú áhugamaður um fótbolta hef ég nú ekki verið að blogga um hann. En það ríkti alger þögn þegar Tottenham rótburstaði og niðurlægði Arsenal í síðustu viku 5-1 og samanlagt 6-2 í Carling cup. Skrýtið. Kannski hann hafi bara verið skák og mát? Samskonar afneitun í gangi og hjá þjálfara Arsenal og "stjörnuleikmönnum" liðsins? Hausinn í sandinn? Hvað veit ég.

Ís-Dan--- Svísland-- Algjör sökksess

Ekki eitt einasta augnablik efaðist ég um að Danir yrðu Evrópumeistarar í handbolta. Og auðvitað vissi ég líka að Íslendingar myndu spila illa á Evrópumótinu. Skýringin er einföld. Þar sem Danmörk er okkar ferskasta nýlenda þá hefur allt hugvit úr íslenskum handbolta verið flutt út til Danmerkur. Þar eru aðstæður miklu betri á allan hátt allt miklu ódýrara (sérstaklega bjórinn eftir leiki) og árangurinn eftir því. Næsta skref (svo að allur heimurinn viti nú hvað þetta fjallar um)er að sameina landslið þjóðanna undir nafninu Ís-Dan sem hefur gefist svo vel hér á landi, samanber Grótta-KR. Næsta skref er svo útrás til Svíþjóðar og þar verður til annað landslið undir nafninu Svísland og leikmenn tala saman á svíslensku. Og þetta er bara byrjunin. Hverjir eru bestir?????????????