Hraðsuðan 3

Á meðan pítsustaðaræningjar ganga lausir á Íslandi, virðast dagar John Howards sem forsætisráðherra  Ástralíu (en þar er árlega haldið mesta ástarrallí í heimi) vera taldir. Þrátt fyrir að Kínverjar séu brjálaðir í málma sem finnast í Ástralíu og kaupi þá dýrum dómum (líklega til að framleiða vopn, nóg er af börnunum til að búa þau til), þá er fólk einfaldlega orðið þreytt á þessum hægri hrærigraut sem Howards hefur staðið fyrir síðustu 11 ár sem forsætisráðherra. Það er ekki bara í Írak sem menn falla í Íraksstríðinu.

Íslenska þjóðin lætur að venju taka sig í rassinn og lætur misvitra stjórnmálamenn ráðskast með milljarðaverðmæti og deila niður, svo allir vinir og familíumeðlimir fái nú sinn skerf og ríflega það. Ég held að það sé kominn tími á að greindarprófa alþingis- og sveitastjórnarmenn og skera af þeim græðgis- og siðleysishnappana. Eða senda þá í meðferð. T.d. að loka þá inni með Sverri Hermannssyni og Hjörleifi Guttormssyni í svona sólarhring. Það ætti að duga til að laga það versta. Og aumingja litli bílasalinn í borgarstjórn Reykjavíkur fær ekki lengur að keyra stóra bílinn sem pabbi gaf honum." Ég vil líka fá" isminn tröllríður nú öllum orkufyrirtækjum þjóðarinnar og verið er að vinna í krónum og aurum svo "allir" fái nú sitt og gott betur.Á Íslandi flýr enginn lögguna því hún er á Vovo og Neskaupstaðarlíkfundaendurkomubannsmaðurinn var gripinn með dóp í gær á hafnfirskri grundu. Ekki eru lengur til nógu stórar ferðatöskur fyrir kaupglaða Íslendinga sem vinna 80 stundir á viku til að geta fyllt upp í þær í mollunum í Minneapolis. Það verður að bæta úr því.

Á Íslandi fara menn úr einni fíkninni yfir í aðra. Ef menn hætta í fíkniefnum falla þeir í tölvuleiki. Ef þeir hætta að drekka negla þeir sig á krossinn hjá Gunnari. En Einar Már Guðmundsson setur Rimla hugans á þýska. Kannski ekki vanþörf á og þeir eiga sér einskis ills von ekki frekar en Danir sem geta nú átt von á því að hin nýja herraþjóð þeirra, Íslendingar, flytji þá unnvörpum til Íslands, því hér vantar alltaf fólk í uppvask og önnur hreinlætisstörf, nú þegar útlendingar streyma til orkulandsins í norðri sem aldrei fyrr. Veðurhorfur næsta sólarhring: Ekkert til að gera veður út af nema ef vera skyldi að á morgun fellur loftsteinn á lóð Orkuveitu Reykjavíkur. Kvissast hefur út að hann verði nefndur ALFREÐ, sem þýðir, eins og nafnið bendir til: Mesta mælanlega frost.

Athugasemdir

[Lárus Gabríel Guðmundsson, 25.11.2007 kl. 23:44]

 frábært !!! Tveir þumlar upp !!!

[Þórarinn Þ Gíslason (IP-tala skráð) 26.11.2007 kl. 06:19]

SAMA SEGI ÉG. FRÁBÆRT.  

OG ÞETTA MEР LOFSTEININN  ALFREÐ.   

MEIRA AF SVONA FÆRSLUM.