Aðalsmerki Íslendinga

Einn af kostum okkar Íslendinga er og hefur verið, hvað þeir eru vel tímasettir. Hugmyndir sem fæðst hafa í útlöndum læðast hingað heim löngu seinna og eru dubbaðar upp sem íslenskar hugmyndir. Þetta hefur tíðkast mjög lengi í auglýsingabransanum og listheiminum og á fleiri sviðum og Íslendingar hafa keppst við að hrósa hugmyndaauðgi samlanda sinna. Við erum svo sannarlega vel tímasett í olíuleitinni. Marga dreymir um það að lifa í olíuríkinu Íslandi í vellystingum. Þar verða engir skattar og engin verðbólga. Við svífum um á íslenskum olíuskýjum og lítum niður á annara þjóða kvikindi, sem eru þarna einhvers staðar og lifa við sult og seyru. Og þetta með tímasetninguna. Þegar olían loksins finnst í hafinu út af Íslandi, þá þarf heimurinn ekki á neinni olíu að halda lengur. Enda komnir aðrir orkugjafar sem gera sama gagn og eru mun vistvænni. Þetta mun sýna svo um munar, hvað við Íslendingar erum alltaf vel tímasettir. Þetta er svona með vinnuna á Íslandi. Hér mæta alltaf allir í vinnuna á réttum tíma. Er það ekki? Allavega , þegar við mætum, þá tökum við til hendinni, ja svona eftir tvo til þrjá kaffibolla og morgunslúðrið. Við vitum alveg hvenær við eigum að byrja að vinna, því við erum svo vel tímasett. Við vitum alveg hvenær á að skipta um borgarstjóra til dæmis og við vitum alveg hvenær við eigum að fara að sofa. Það er ekki fyrr en við höfum drollað eitthvað fram eftir nóttu. Þess vegna þurfum við svona mikið kaffi á morgnana, til að koma okkur í gang. Góð tímasetning. Það er aðalsmerki okkar Íslendinga. 

Olíurisar sýna áhuga á borun

Athugasemdir

[vignir (IP-tala skráð) 22.8.2008 kl. 09:56]

Og hvað? Heldur þú að eitthvað af gróða skili sér til þjóðar?

Það verða handfylli af mönnum sem munu stela 90% af því sem þjóðinni ber fyrir þetta.

[Ásgeir Kristinn Lárusson, 22.8.2008 kl. 09:59]

Getum við ekki, þessi framsýna þjóð, farið að rækta kaffi í stórum stíl. Sé fyrir mér nöfn einsog Hólasandskaffi, Nesjavallakaffi, Kröflukaffi o.s.frv...:)

[Bergur Thorberg, 22.8.2008 kl. 16:35]

Sammála ykkur báðum.