Ölvaður og æstur hælisleitandi kastaði bjórflösku í lögreglubifreið

Þessa frétt þurfti ég að lesa þrisvar til að vera viss. " Lögreglubifreið skemmdist er henni var ekið framhjá einum af skemmtistöðum Reykjanesbæjar við Hafnargötu. Ölvaður og æstur hælisleitandi kastaði í hana bjórflösku. Sá var handtekinn og vistaður í fangageymslu. Verður hann yfirheyrður síðar". Allt er þetta samkvæmt dagbók lögreglu. Er það venja hjá lögreglunni á Suðurnesjum að tilgreina nákvæmlega í hvað stöðu menn eru í þjóðfélaginu, þegar hún verður að hafa afskipti af þeim? Ég er ekki að mæla því bót að menn kasti bjórflöskum í lögreglubíla, en hvers vegna í ósköpunum er tekið fram, að um hælisleitanda sé að ræða?  Er það vegna atburða liðinna daga? Er þarna svona augljós rasismi í gangi að lögreglan hefur ekki getað stillt sig um að nefna þetta í dagbókinni? Ég ætla að vona að þetta sé ekki prentvilla eða innskot blaðamanns Moggans. Enda kemur skýrt fram í fréttinni að þetta sé úr dagbók lögreglunnar. Lögreglan á Suðurnesjum er ekki öfundsverð af því, að hafa þurft að hafa afskipti af svo mörgum ribböldum, fyllibyttum og ólátabelgjum í nótt, eins og raun bar vitni. Það afsakar samt ekki það, að taka svona lagað fram í lögregluskýrslu, sem er síðan gerð opinber nánast strax. Þetta segir okkur nánast ekki neitt um "hælisleitandann". Það er daglegur viðburður að bjórflöskum sé kastað í allar áttir á Íslandi af "Íslendingum". Þetta segir hins vegar ansi margt um lögregluna á Suðurnesjum, ef satt er. Ja hérna. Hreina Ísland.

Læti á Suðurnesjum í nótt

Athugasemdir

[Guðmundur Guðmundsson (IP-tala skráð) 6.7.2008 kl. 08:41]

Ég býst við að þetta sé grín og í þessu samhengi sé hann hælisleitandi þar sem þú veist alveg hvað gerist ef þú ert að grýta lögguna.

[Bergur Thorberg, 6.7.2008 kl. 08:46]

Já, þú meinar það? Þar sem við ættum að vera? hm....

[Hjörtur J. Guðmundsson, 6.7.2008 kl. 09:36]

Rasismi? Snýst málið s.s. um kynþætti?

[Ágúst (IP-tala skráð) 6.7.2008 kl. 12:31]

Hélt nú að þetta hefði hvert mannsbarn með snefil af heilastarfsemi átt að skilja, en nei svo er víst ekki. Fyndið.

[Jón Bragi (IP-tala skráð) 6.7.2008 kl. 14:02]

Sælir

Já þetta er vægast sagt einkennileg frétt og leiðir einsog þú segir hugan að atburðum síðustu daga með Kenýa-manninn. Í því máli hafa ýmsir og ekki síst vor ástsæli dómsmálaráðherra viljað halda því fram að hann sé hinn versti maður.

Og fáum við það staðfest af lögreglunni á Suðurnesjum að hælisleitendur séu gjarnan hinir verstu ribbaldar og ódæðismenn...

Þetta minnir mig á hvað það pirraði mig á áttunda áratugnum þegar ég var sjómaður að oft var það tekið fram í fjölmiðlum að ölvaður sjómaður gerði hitt og þetta miður fallegt en aldrei sá maður fréttir einsog "ölvaður bókari hjá tryggingafélagi gekk berserksgang", eða "trésmiður tekinn fyrir ölvunarakstur".

Lifið heil!

[Bergur Thorberg, 6.7.2008 kl. 14:07]

Þú hittir naglann á höfuðið Jón Bragi.

[Jón Bragi (IP-tala skráð) 6.7.2008 kl. 23:04]

Gleymdi bara að taka það fram að ég er lesgleraugnaleitandi íslendingur í útlöndum...

[Bergur Thorberg, 6.7.2008 kl. 23:22]

Aftur hittirðu naglann á höfuðið. Gleraugnalaus. Ég þekki marga í útlöndum. Ég skal leggja inn gott orð. Þ.e.a.s. ,ef ég finn gleraugað mitt. kv.