Pínleg mistök hjá Mogganum

Við listamenn hljótum að fagna umfjöllun um menningu á forsíðu Morgunblaðsins. Þetta er eitthvað nýtt og fylgir kannski nýjum ritstjóra. En í dag var eitthvað sem klikkaði. Sjálfur fór ég í leikhús í gær og sá uppsetningu Halaleikhópsins á Gaukshreiðrinu í Þjóðleikhúsinu. Umfjöllun með mynd um sýninguna er á forsíðunni í dag. Gallinn er bara sá að það er röng mynd sem fylgir fréttinni. Myndin er af uppsetningu leikfélagsins Peðsins á Grand Rokk, sem frumsýnir nú um helgina leikrit Benónýs Ægissonar Skeifa Ingibjargar. (Eiginkona Jóns Sigurðssonar forseta). Mjög pínlegt fyrir nýjan ritstjóra að byrja svona. Vonandi verður þetta leiðrétt. Vel á minnst: Árleg Menningarhátíð Grand Rokks verður sett nú í dag kl. 18.00. Stendur hún alla helgina og ókeypis er á alla viðburði. (Leiklist, tónleikar, ljóð, glæpasögur, lifandi málun listamanna og í kjölfarið, myndverka uppboð). Nóg um að vera alla helgina. Allir boðnir hjartanlega velkomnir. Sem sagt: Grand Rokk á Smiðjustíg. Það er staðurinn um helgina. Og svo náttúrulega opnunin í Reykjavík Art Gallery, Skúlagötu 30, á laugardaginn kl. 14.00.

Algert k(h)valræði

Ég skrifaði á blogginu mínu að þetta hvítabjarnardráp myndi vekja heimsathygli og það hefur gengið eftir. Eftir stendur: Maður drepur ekki dýr í útrýmingarhættu. Eigum við ekki að segja að þetta hafi verið bjarnargreiði fyrir ferðaþjónustuna. Ég hef öngva trú á því að fólk flykkist hingað til að sjá galvaska veiðimenn drepa dýr í útrýmingarhættu, Ó nei. Þetta er að verða algert k(h)valræði.

Hvítabjarnarmál vekur athygli

Pottþétt Blanda!

Blanda byrjar með látum. Fimm á klukkutíma. Ég er alinn upp í nágrenni við þetta straumharða fljót og veiddi þar strax á barnsaldri með föður mínum og fleirum. Veitt var á spún í þá daga (ekkert húkk) en aldrei á maðk. Kemur á óvart að laxarnir hafi allir veiðst á maðk, fyrst áin er svona lituð. En Blanda hefur breyst mikið á seinni árum og er nánast stundum tær eins og bergvatnsá. En að dvelja einn dag á neðstu veiðisvæðunum, svíkur engan. Ég veit ekkert hvað dagurinn kostar í Blöndu, sjálfsagt töluvert, svo ég er að hugsa um að láta ekki nostalgíuna ráða að þessu sinni, heldur fara bara í Veiðivötn, sem bregðast aldrei, og hafa málaragræjurnar með í bland við veiðidótið. Pottþétt Blanda.

Veiði byrjar vel í Blöndu

Um Guðsmennina gylltir tónar hljóma

Um Guðsmennina gylltir tónar hljóma,

gleymt er allt um holdsins dýru synd.

Vatni er breytt í vín með dýrð og ljóma,

veltist nú um

í vímunni gjörvöll mannkind.

(Erindi úr söngtexta sem ég samdi 1984). Ég segi nú eins og þeir sögðu á veðurstofunni í gamla daga: Hiti breytist lítið. Alltaf sama sagan. Kannski er jörðin bara flöt? Hver veit? Kannski kaþólskir leikmenn. Best að hringja í þá áður en maður leggur land undir fót.

Segja upp viðskiptum við Símann

Smá von fyrir heimskingja eins og mig

Jæja , þetta vekur upp smá von ,svona fyrir svefninn, að maður fái að lifa aðeins lengur hér á jörðinni, heimskur sem maður er. Ekki eru gáfurnar að halda fyrir manni vöku, svo mikið er víst. Annars hef ég öngvan skilning á því sem ég er að skrifa núna, svo það er best að hætta að pikka og fara að leggja sig. Góða nótt.

Heimskar flugur lifa lengst

Steypireyðarárás í vændum

Verður ekki hafa snör handtök og drepa þessar steypireyðar? Það gæti verið steypireyðarárás í vændum. Nú höfum við góða reynslu af ísbjarnardrápi, svo þetta ætti ekki að verða erfitt.

Steypireyðar á Skjálfanda

Krónan í öndunarvél (frétt af visir.is)

13:19

Krónan í öndunarvél frá Landspítalanum

Bergur Thorbergs listamaður. Öndunarvélin við hlið hans.

SB skrifar:

Listamaðurinn Bergur Thorbergs fékk lánaða öndunarvél frá Landspítala Háskólasjúkrahúsi í nýtt verk sem verður afhjúpað í Reykjavík Art Gallerí á Skúlagötunni á föstudaginn.

Öndunarvélin blæs lífi í litla svarta líkkistu fulla af íslenskum krónum. Sviðsstjóri hjá Landspítalanum segir öndunarvélina ekki vera í notkun á spítalanum heldur hafi hún verið í geymslu sökum almannahagsmuna.

"Þetta er öndunarvél af fullkomnustu gerð. Hefur örugglega kostað margar milljónir," segir Bergur Thorberg sem er þekktur fyrir kaffimyndir sínar sem hann málar á hvolfi. "Ég tengdi vélina við lítinn peningakistil sem er full af íslenskri mynt frá öllum öldum. Síðan hjálpar vélin peningunum til að anda, blæs lofti inn í kistilinn svo peningarnir rísa og hníga."

Kistillinn er svartur á litinn. Eins og líkkista.

"Ég neita því ekki að verkið er pólitískt," segir Bergur. Ég er að vísa beint til samtímans."

Þorgeir Pálsson sviðsstjóri á heilbrigðistæknisviði segir almenna reglu spítalans að lána vélar ekki út. Hins vegar væru geymslurnar fullar af gömlum vélum sem er ekki hent út af almannavarnarhlutverki spítalans. "Ef eitthvað stórt kæmi upp á þá eigum við þessi gömlu tæki til vonar og vara. Við notum tækin hins vegar ekki daglega hér innan hús, þróunin er hröð og við viljum aðeins bjóða upp á fullkomnustu tækni inn á spítalanum."

Umræðan um bága fjárhagsstöðu spítalana og fjársvelti af hálfu ríkisins er oft fyrirferðarmikil í samfélaginu. Spurður hvort það hafi táknræna merkingu af hálfu spítalans að lána öndunarvélina í listaverk, þar sem vélin blæs lífi, ekki í fólk, heldur peninga, hlær Þorgeir.

"Spítalinn tekur aldrei afstöðu til listaverka," segir Þorgeir, "en ef menn vilja túlka að þarna sé verið að benda á hvernig búið er að ríkisspítölunum er þá ekki bara sjálfsagt að taka undir það?".

Fæðingarblettur í handarkrikanum hindrar starfsframa minn

Ja nú er það ljótt maður. Ég sem ætlaði að sækja um inngöngu í spænska þjóðvarðliðið. Ef ég hefði nú fengið leyfi til inngöngu, þá sé ég alveg fyrir mér þegar við gefumst upp fyrir Portúgölum og réttum upp hendur í hitanum. Þá blasir við stór fæðingarblettur, sem ég er með í öðrum handarkrikanum. Það gengur ekki er ég hræddur um.

Skrækróma menn mega ekki verða þjóðvarðliðar

KK allur

Þá er einn frumkvöðullinn fallinn frá í viðbót. KK var vissulega frumkvöðull. Hann blés töfrandi lífi í íslenskt tónlistarlíf á eftirstríðsárunum og var þar fremstur meðal jafningja. Það var margur tónlistarmaðurinn sem kom við í KK sextettinum og öðlaðist þar mikla reynslu. Ég man eftir honum þegar ég var barn og hann kom í heimsókn í þorpið mitt ásamt konu sinni Erlu. Þá var sko líf í tuskunum og þau hjónin geisluðu af krafti og gleði. Síðar kynntist ég tveimur börnum þeirra hjóna, Pétri og Sigrúnu og þar var það sama uppi á teningnum: Mikil gleði, mikill kraftur. Ég votta ættingjum Kristjáns mína dýpstu samúð.

Andlát: Kristján Kristjánsson (KK) tónlistarmaður

Þriðjungi dýrara að deyja í sumar

Þriðjungi dýrara verður að deyja í sumar. Öll aðföng til líkkistusmiða hafa hækkað til muna. Þá hafa laun presta og tónlistarmanna hækkað og blóm eru mun dýrari en áður Nei bíddu........ Greinin fjallar um heyskap og bændur... heyrðu ég bið innilega afsökunar...það er svona að vera gleraugnalaus á morgnana.

Þriðjungi dýrara að heyja í sumar