Nautheimsk lítilmenni

Nautheimskir útlendingar að reyna að vera töff. Geta svo svalað drápseðli sínu í nautaatinu í lokin. Ásamt heimamönnum. Ljótt, löðurmannlegt og lítilmennska á háu stigi. The sun also rises. Og peningarnir flæða inn..... og nautin gjalda með lífi sínu. Undir kröftugu lófataki lítilmenna.

45 slösuðust í Pamplona

Upp á borðið með þetta

Þegar Guðmundur Þóroddsson var spurður í Kastljósi um bílamál var svarið eingöngu að þó Orkuveitan væri í almenningseign þyrfti að reka Orkuveituna eins og önnur fyrirtæki. Enginn botn komst í þessi bílamál í því Kastljósinu. Geta þessir aðilar ekki lagt gögn á borðið um t.d. þessi bíla mál og stoppað þar með getgátur og kjaftagang sem veður um í þjóðfélaginu? Var innihald svars Guðmundar í Kastljósi það, að þegar forstjórar hætta hjá fyrirtækjum, þá hafi þeir almennt með sér glæsibifreiðir og sitthvað fleira? Upp á borðið með þetta strax. Starfslokasamningar forstjóra fyrirtækja í almenningseigu hafa hingað til ekki glatt íslensku þjóðina mjög. En til þess að taka afstöðu í þessu máli verður maður að hafa eitthvað í höndunum til að byggja afstöðu sína á. Maður getur ekki byggt afstöðu sína á æsifregnum fjölmiðla og kjaftagangi úti í bæ. Íslenska þjóðin getur ekki endalaust lifað við eitthvað pukur í almenningsfyrirtækjum.

Guðmundur skilaði gögnunum

Reiðufé eða riðufé?

Ég er ekki alveg búinn að mynda mér skoðun á því sem hér er á seyði. Bandríkjamenn borga sjálfsagt brúsann og ekkert nýtt í því, að þeir kaupi fólk til liðs við sig. En ef myndin með fréttinni er skoðuð, gæti maður ályktað að embættismennirnir hafi verið að dreifa riðufé en ekki reiðufé. Ég ætla að vona að svo sé ekki.

Maliki dreifir reiðufé

Oh my God...... don't let her die...... please...

Hollywood og sjónvarpsmafían í Bandaríkjunum hefur drepið og búið til nýtt fólk á færibandi svo lengi sem ég man eftir mér, til að viðhalda hæfilegri blöndu af tilbúinni gleði og sorg í þessari endalausu sápuvitleysu sinni. Og að sagan sem sögð er í þessari frétt, fljúgi fjöllunum hærra, segir okkur eiginlega allt um þetta dæmalausa bull sem er í gangi í kringum ekki neitt. Það er svo önnur saga, að ef einhver persóna deyr í þessu veruleikafirringarbulli, þá er eins og náinn ættingi hafi látist á vofeiflegan hátt, í fjölmörgum (allt of mörgum) fjölskyldum í heiminum. Froðukarlarnir og froðukerlingarnar hafa nefnilega náð að spýta þessu afþreyingareitri beint í æðar fólks um allan heim, og sitja svo hlæjandi á gullhaugum, sem stækka með hverri klukkustund sem líður. Og gantast við nágranna sína á næstu gullhaugum, en þeir eru í poppi, kók og pepsi, eða hvað þetta heitir nú allt saman, og eru að meika það líka. Á okkar kostnað. Var mig að dreyma? Já auðvitað, nei....... The American dream.... er í sjónvarpinu þínu.... akkúrat... núna.

Er Izzie dauðvona?

Fyrst þjálfunar-, svo mótmæla- og síðan vinnubúðir. Usssssssss.........

Ussssssussssss, ekki hafa hátt! Ég er að bjarga Íslandi. Ég bjarga því með hreinum rúmfötum og hlýju, skapaðri af íslenskri orku. Hafið ekki hátt, þetta gæti misskilist. Ég er nefnilega mikill náttúruverndarsinni, þó illar tungur ráðist að mér stundum og segi að ég sé algerlega náttúrulaus........ í hjartanu. Það má bara enginn vita hvað ég er mikill náttúruverndarsinni. Þið lofið að segja engum frá því. Uss... nú kemur einhver......

Styðja Saving Iceland á hljóðlátan hátt

Vonandi eru Ísraelsmenn ekki litblindir

Bíddu, ég skil ekki alveg. Er Bush æðstráðandi í Ísrael? Auðvitað eru tengslin ljós á milli Bandaríkjanna og Ísrael en er það bókstaflega þannig að Bush ræður hvenær Ísraelar hefja hernaðaraðgerðir? Jahá. Hann er aldeilis gjafmildur. Gefur þeim gult ljós. Kannski rauð og græn líka? Það er eins gott að menn séu ekki litblindir þegar þeir taka við svona gjöfum. Þá er aldrei að vita hvað gerist.

Bush gefur gult ljós á árás

Man U í sárum

Ég get ekki að því gert að mér finnst oft skína í hroka hjá Sir Alex Ferguson í viðtölum. Hann segir núna að ekkert liggi á að velja eftirmann Queiros. Það liggur í orðunum: Ég er bestur og þarf enga hjálp. Það er alveg víst að Queiros hefur átt drjúgan þátt í velgengni Man U á undanförnum árum og nú er skarð fyrir skildi. Vonandi verður hrokinn ekki Sir Alex að falli, en ég spái því, að Man U gæti lent í vandræðum á næstu leiktíð.

Carlos Queiroz: Erfið ákvörðun að fara frá United

Fullreynt í fjórða?

Sá er upprennandi þessi. Þarna er einhver harmleikur á bak við, sem yfirvöld og fjölskylda viðkomandi pilts verða að vinna úr saman. Ef rétt er að hann sé sekur um að hafa ráðist á leigubílstjórann, þá er málið komið á mjög alvarlegt stig. Það er reyndar mjög svo eftirtektarvert að unglingi, sem grunaður er um svo alvarlegan glæp, sem líkamsárás vissulega er, skuli sleppt svo fljótt úr haldi, sem raun bar vitni. Lítur lögreglan á svona ofbeldi sem smámál? Það er sko ekkert smámál þegar ráðist er að fólki eins og lögreglan sjálf komst svo að, þegar handtaka átti piltinn öðru sinni. Í þessu tilviki skulum við forðast að sanna orðatiltæki eins og, allt er þegar þrennt er og fullreynt í fjórða. Þá gætum við setið uppi með ennþá alvarlegri glæp.

Látinn laus en handtekinn skömmu síðar

Ömurlegt Ógnvænlegt Óverjandi

Mikil dæmalaus fífl væru Bandaríkjamenn, ef þeir kysu þennan aldna hauk yfir sig í nóvember. Að láta svona út úr sér, er náttúrulega bara heimska, nema maðurinn sé svo heiðarlegur að hann geti ekki farið dult með þessar öfgakenndu skoðanir sínar. Hvort heldur sem er: Ömurlegt.

Íranar gagnrýna ummæli McCain

Í göngutúr með franskri hefðarmær

Fór í langa strembna ferð í 101 í dag, sem reyndist þegar upp var staðið, ágætis svefnmeðal. Með í för var ung frönsk hefðarmær að nafni, Natashja Alexandra Presley. Virtist hún njóta ferðarinnar í rigningunni. Rignir líka í Reykjavík? Hún leit á mig spyrjandi augum og ég stamaði einhverju út úr mér um, að það gerðist stundum. Mér fannst eins og hún skildi ekki alveg hvað ég var að fara, enda franskan mín ekki verið fínpússuð upp á síðkastið. Fyrsti áfangastaður var Reykjavík Art Gallery á Skúlagötunni. Þangað varð ég að fara til að kveikja á öndunarvélinni minni, sem er tengd við íslensku krónuna. Sem betur fer var krónan ekki alveg dauð, þrátt fyrir öndunarvélarleysið alla nóttina, og færðist fljótt í hana líf og roði hljóp um kinnar. Þegar við fórum, andaði hún ótt og títt eins og tíeyringur í tunglsljósi. Því næst var ferðinni heitið á tónleika hjá Skrokkabandinu. Reyndust þeir hin besta skemmtun, þó svo hin franska játaði fyrir mér, að hún skildi ekki eitt einasta orð. Það var kannski eins gott, því sumir textanna voru eins og samdir í myrkraherbergi í skammdeginu og herbergið hafi verið fullt af sauðdrukknum mönnum með sáðlátsdrauma. Síðan skárum við okkur leið í gegnum rigninguna, með hausinn fullan af ljóðum, sem við höfðum samið á staðnum, og linntum ekki leið okkar, fyrr en við komum heim á Grettisgötuna. Sótti þá á mig þvílíkur svefn, að ég mátti ganga til rekkju og svaf ég vænan klukkutíma. Ég vaknaði við að sú franska klóraði í rúmstokkinn og horfði á mig spyrjandi augum? Eigum við ekki að fá okkur eitthvað að borða? Si vou plait? Að lokinni ljúfengri máltíð með eðalvínum, sá ég að sú franska var farin að ókyrrast. Þá gerði ég mér allt í einu grein fyrir því, að sú franska hafði ekki gert stykkin sín í ferðinni góðu. Svo nú er það bara regnhlífin og út, áður en það verður of seint.